Bae sonde Bae

Dudu sandiri di pak laru
Hati itu rasa terharu
Diri sandiri bagitu sepi
Pikir-pikir mau minum sopi.

Hari Jum’at Islam ke langgar
Bikin jiwa segar dan bugar
Tapi Kristen sandiri pi kerja
Hari Jum’at son pi gareja.

Inga2 nasa dol kala
Barmaen bola son mau kala
Kalo son ada bola kulit
Pake pomparmus memang son sulit.

Dudu di pandopo makan lampar
Inga orang miskin yang lagi lapar
Karna kotong Tuhan berkati
Kotong harus murah hati.

Ana-ana kuti kalereng
Di tanah rata bukan lereng
Baju ba abu, tangan su kotor
Yang paling penting deka di tor.

Ru’i rambut karna su marah
Kapala panas sama api bara
Lari pi baranang di kali Dendeng
Pulang di rumah makan kacang sarondeng.

Nae pohon pi ketu mangga
Dapa satu bakul rasa bangga
Tar tau mangga asam sakali
Lalu buang mangga kedalam kali.

Siang hari pi fiti burung
Burung yang hidup mau di kurung
Mama bilang "Apa lu suka,
Kalo lu di fiti sampe luka?"

Mama suruh pi tofa rumpu
Sampe kaki rasa lumpu
Beta bilang beli lawn mower
Mama bilang "Lawn Mower? Pi maloi di mirror."

Deng taman laen mau baganggu
Kalo mau nakal sonde ragu-ragu
Tapi kalo beta diganggu, beta tunggu
Untuk falungku dia pung dagu.

Kota SoE kota yang dingin
Baju panas samua kapingin
Kota Kupang kota yang indah
Ke kota itu banyak yang pindah.

Jalan-jalan ke Oebobo
Dengar orang manyanyi Bolelebo
Tanah Timor memang lebe bae
Tapi gunung Mutis beta son pernah nae.

Cipt. Om Gus di USA